വാക്സിന്‍ പ്രതിരോധ്യ രോഗങ്ങള്‍

ലപ്രദമായ  വാക്സിനുകള്‍  നിലവിലുള്ള  രോഗങ്ങളാണ്  വാക്സിന്‍  പ്രതിരോധ്യ  രോഗങ്ങള്‍  എന്ന  പേരില്‍  അറിയപ്പെടുന്നത്.  ഈ  രോഗങ്ങള്‍  മൂലമുണ്ടാകുന്ന  മരണങ്ങളെ  വാക്സിന്‍  പ്രതിരോധ്യ  മരണങ്ങള്‍  എന്നും  വിശേഷിപ്പിച്ചു  പോരുന്നു.

ലോകാരോഗ്യസംഘടനയുടെ  കാഴ്ചപ്പാടില്‍  ദിഫ്തീരിയ,  ഹീമോഫിലസ്  ഇന്ഫ്ലുവെന്സ  ബി,  മീസില്‍സ്,  ഹെപ്പറ്റൈറ്റിസ്  ബി,വില്ലന്‍  ചുമ,  മസ്തിഷ്ക്കജ്വരം,  മുണ്ടിനീര്,  പോളിയോ,  കുതിരസന്നി,  റുബെല്ല,  ക്ഷയം,  മഞ്ഞപ്പനി  എന്നിവയാണ്  വാക്സിന്‍  പ്രതിരോധ്യ  രോഗങ്ങളില്‍  പ്രധാനികള്‍.  ഏകദേശം  ഇരുപത്തിയഞ്ചോളം  രോഗങ്ങള്‍ക്കെതിരെ  ലോകാരോഗ്യസംഘടനയുടെ  അംഗീകാരം  ഉള്ള  വാക്സിനുകള്‍  ഇന്ന്  ലോകത്തു  ലഭ്യമാണ്.

രോഗപ്രതിരോധ  മേഖലയിലെ  ഈ  മഹാത്ഭുതങ്ങള്‍  ലോകമെമ്പാടും  രണ്ടര  മില്യണ്‍  ജീവന്‍  ഓരോ  വര്‍ഷവും  സംരക്ഷിക്കുന്നുണ്ട്.  100%  കവറേജും  100%ഗുണഫലവും  ഈ  വാക്സിനുകള്‍ക്കു  ലഭിച്ചാല്‍  ഇന്ന്  വികസ്വരരാജ്യങ്ങളില്‍  സംഭവിക്കുന്ന  ഏഴു  ശിശുമരണങ്ങളില്‍  ഒരെണ്ണം  എങ്കിലും  തടയാന്‍  ആകും  എന്നാണ്  ലോകാരോഗ്യസംഘടനയുടെ  കണക്കുകള്‍  സൂചിപ്പിക്കുന്നത്.  വാക്സിന്‍  പ്രതിരോധ്യ  മരണങ്ങളില്‍  98  ശതമാനവും  സംഭവിക്കുന്നത്‌  ഹീമോഫിലസ്  ഇന്ഫ്ലുവെന്സ  ബി,  മീസില്‍സ്,  വില്ലന്‍  ചുമ,  കുതിരസന്നി  എന്നീ  രോഗങ്ങള്‍  മൂലമാണ്.  ലോകത്താകമാനം  ഈ  മരണങ്ങള്‍  പൊതുവായി  സംഭവിക്കുന്നതിനുള്ള  പ്രധാന  കാരണം  വാക്സിനുകള്‍  എടുക്കുവാനുള്ള  സാമ്പത്തിക  ശേഷി  ഇല്ലായ്മയും  ആരോഗ്യ  സംവിധാനങ്ങളിലെയ്ക്ക്  എത്തിപ്പെടാനുള്ള  ബുദ്ധിമുട്ടുകളും  ആണു.  പക്ഷേ  നമ്മുടെ  കൊച്ചുകേരളത്തിലോ?  വാക്സിനുകളെ  അന്താരാഷ്‌ട്ര  ഗൂടാലോചനാ  സിദ്ധാന്തങ്ങളുടെ  പൊടിപ്പും  തൊങ്ങലും  വച്ച  മസാലക്കഥകളിലേയ്ക്ക്  ബോധപൂര്‍വ്വം  കുത്തിത്തിരുകി  ചില  കുബുദ്ധികള്‍  നടത്തിപ്പോരുന്ന    കുപ്രചരണങ്ങളില്‍  വീണുപോകുന്ന  ഒരു  സമൂഹം  ആണു  നമ്മുടെ  പ്രധാന  വെല്ലുവിളി.

വസൂരി

പതിനെട്ടാം നൂറ്റാണ്ടില്‍ യൂറോപ്പില്‍ വര്‍ഷംതോറും 4 ലക്ഷം പേരോളം വസൂരിയാല്‍ മരിച്ചിരുന്നു. മുതിര്‍ന്നവരില്‍ മരണ നിരക്ക് 30% ത്തോളം ആയിരുന്നു എങ്കില്‍ കുട്ടികളില്‍ അത് 90%നു മുകളില്‍ ആയിരുന്നു. ഇരുപതാം നൂറ്റാണ്ടിൽ 30 കോടിക്കും 50 കോടിക്കും ഇടയിൽ ആൾക്കാർ ഈ അസുഖം ബാധിച്ച് മരിച്ചിട്ടുണ്ട് എന്നാണു കണക്കുകള്‍

കൂടുതൽ അറിയുക

ക്ഷയരോഗം

പുരാതനകാലം മുതല്‍ക്കേ മനുഷ്യനെ ബാധിച്ചിരുന്ന ഒരു രോഗമാണ് ക്ഷയം. പ്രധാനമായും മൈക്കോബാക്ടീരിയ ട്യൂബര്‍ക്കുലോസിസ് എന്ന ബാക്ടീരിയയുടെ അണുബാധമൂലമാണ് ക്ഷയരോഗം ഉണ്ടാകുന്നത്. ക്ഷയരോഗം പ്രധാനമായും ശ്വാസകോശങ്ങളെയാണ് ബാധിക്കുന്നതെങ്കിലും ശരീരത്തിലെ മറ്റ് അവയവങ്ങളേയും അത് ബാധിക്കാറുണ്ട്.

കൂടുതൽ അറിയുക

ഡിഫ്തീരിയ അഥവാ തൊണ്ട മുള്ള്

നമ്മുടെ സ്വന്തം ഇന്ത്യയിലെ കാര്യം നോക്കുമ്പോൾ, 2005ൽ ലോകത്താകെ 8229 ഡിഫ്തീരിയകേസുകൾ റിപ്പോർട്ട് ചെയ്തപ്പോൾ അതിൽ 5826 എണ്ണവും (71%) ഇന്ത്യയിൽ നിന്നായിരുന്നു എന്നത് വളരെ സങ്കടകരമായ ഒരു വസ്തുതയാണ്. ഇതിൽ കൂടുതൽ പേരും 5 വയസ്സിനു മുകളിൽ പ്രായമുള്ളവരായിരുന്നു എന്നത് നമ്മുടെ പ്രതിരോധകുത്തിവയ്പ്പിന്റെ പോരായ്മയായിലേക്കാണു വിരൽ ചൂണ്ടുന്നത്. ഈയടുത്ത കാലത്ത് മലപ്പുറത്ത് റിപ്പോർട്ട് ചെയ്ത ഡിഫ്തീരിയ കേസുകളും 5 വയസ്സിനു മുകളിൽ പ്രായമുള്ളവരായിരുന്നു എന്നത് ശ്രദ്ധിക്കുക.

കൂടുതൽ അറിയുക

ടെറ്റനസ്

പ്രതിരോധകുത്തിവയ്പ്പുകൾ വഴി പൂര്‍ണ്ണമായി പ്രതിരോധിക്കാന്‍ കഴിയുന്ന ഒരു രോഗമാണ് ടെറ്റനസ്. ഈ രോഗത്തെ കുതിരസന്നി എന്ന് മലയാളത്തിലേക്ക് വിവര്‍ത്തനം ചെയ്യാവുന്നതാണ്. ബി.സി. 5-ാം നൂറ്റാണ്ടുമുതല്‍ തന്നെ ഈ രോഗത്തെക്കുറിച്ചുള്ള പരാമര്‍ശങ്ങളുണ്ട്. വലിയുക എന്നര്‍ത്ഥമുള്ള ടെറ്റനോസ എന്ന ഗ്രീക്ക് പദത്തില്‍ നിന്നാണ് ഈ രോഗത്തിന്‍റെ പേര് ഉത്ഭവിച്ചത്. മലിനമായതും, ആഴത്തിലുള്ളതുമായ മുറിവുകളിലൂടെ ശരീരത്തില്‍ പ്രവേശിക്കുന്ന ക്ലോസ്ട്രീഡിയം ടെറ്റനി  എന്ന ബാക്ടീരിയയാണ് ഇതിന്‍റെ രോഗഹേതു.

കൂടുതൽ അറിയുക

അഞ്ചാംപനി

ലോകമാകമാനം ഏകദേശം രണ്ടുകോടി ആളുകളെ ബാധിക്കുന്ന, വളരെയധികം സാംക്രമിക ശേഷിയുള്ള ഈ രോഗം പ്രധാനമായും ബാധിക്കുന്നതു കുട്ടികളെയാണ്. വികസ്വരരാജ്യങ്ങളില്‍ ഈ രോഗത്തിന്റെ മൃത്യു ശേഷി രണ്ടു മുതല്‍ പതിനഞ്ചു ശതമാനം വരെയാണ്.

കൂടുതൽ അറിയുക

ജപ്പാന്‍ മസ്തിഷ്ക ജ്വരം (ജാപ്പനീസ് എന്‍സെഫലൈറ്റിസ്)

കൊതുകിലൂടെ പകരുന്ന ഒരു വൈറസ് രോഗമാണ് ജപ്പാന്‍ മസ്തിഷ്കജ്വരം.  ഇത് പന്നികളിലും ജലാശയങ്ങളോടു ചേര്‍ന്നുജീവിക്കുന്ന പക്ഷികളിലും സാധാരണയായി കാണപ്പെടുന്നു. ഈ ജന്തുക്കളില്‍നിന്നും ക്യൂലക്സ് വര്‍ഗ്ഗത്തില്‍പ്പെട്ട കൊതുകുകള്‍ വഴിയാണ് മനുഷ്യരിലേക്കെത്തുന്നത്. മസ്തിഷ്കജ്വരത്തിന്റെ ലക്ഷണങ്ങള്‍ കാണിച്ചുതുടങ്ങിയ രോഗികളില്‍ 25% പേരും മരണത്തിനു കീഴ്പ്പെടുന്നതായി കണക്കുകള്‍ കാണിക്കുന്നു. രോഗത്തെ അതിജീവിക്കുന്നവരില്‍ പകുതി ആളുകളിലും ഏതെങ്കിലും തരത്തിലുള്ള അവശിഷ്ടവൈകല്യങ്ങള്‍ കണ്ടേക്കാം.

കൂടുതൽ അറിയുക

പോളിയോ

1950 കളിലും 60 കളിലും ഇന്ത്യയിൽ ഏതാണ്ട്  10,000ത്തിൽ 25 പേർക്ക് പോളിയോ ബാധിച്ചിരുന്നതായും 1000 കുട്ടികളിൽ 6 പേർക്ക് പോളിയോയുടെ ഫലമായി അംഗവൈകല്യം സംഭവിച്ചിരുന്നതായുമായാണ് കണക്കുകൾ. എന്തിനധികം പറയുന്നു, ഈ നൂറ്റാണ്ടിന്‍റെ തുടക്കത്തിൽ പോലും ഇന്ത്യയിലെ മുഴുവൻ അംഗ പരിമിതരുടെ പകുതിയോടടുപ്പിച്ച് പോളിയോ രോഗത്തിന്‍റെ രക്തസാക്ഷികളായിരുന്നു. പോളിയോ ഒരിക്കൽ ബാധിച്ചാൽ പിന്നെ ചികിത്സയില്ല.

കൂടുതൽ അറിയുക

മുണ്ടിനീര്

കവിളിന്റെ സമീപത്തുള്ള പരോട്ടിഡ് ഗ്രന്ഥികള്‍ (parotid glands) എന്ന് പേരുള്ള ഉമിനീര്‍ഗ്രന്ധികളെ കൂടുതലായി ബാധിക്കുന്ന ഒരു രോഗമാണ് മുണ്ടിനീര് അഥവാ മുണ്ടിവീക്കം(mumps). ലോകമെമ്പാടും കാണപ്പെടുന്ന ഈ രോഗം ഏപ്രില്‍, മെയ്‌ മാസങ്ങളിലാണ് കേരളത്തില്‍ കണ്ടുവരുന്നത്.

കൂടുതൽ അറിയുക

റുബെല്ല

കുട്ടികളിൽ വളരെ സാധാരണമായി കണ്ടുവരുന്ന ഒരുതരം പൊങ്ങൻ പനിയാണ് റുബെല്ല അഥവാ ജർമ്മൻ മീസൽസ്. ഇത് ഒരു സാംക്രമികരോഗമാണ്. പൊതുവെ പറഞ്ഞാൽ ഒരു നിസ്സാര രോഗമാണിത്. പക്ഷേ ഗർഭിണികളെ ബാധിക്കുമ്പോൾ റുബെല്ല ‘കൺജെനിറ്റൽ റുബെല്ല സിൻഡ്രോം’ ( Congenital Rubella Syndrome – CRS ) എന്ന ആസുരഭാവം കൈവരിക്കുന്നു. ഗർഭഛിദ്രത്തിനിടവരുത്തുകയോ ഗർഭസ്ഥശിശുക്കളെ കൊല്ലുകയോ വൈകല്യങ്ങൾ ഉണ്ടാക്കുകയോ ചെയ്യുന്നു.

കൂടുതൽ അറിയുക

വില്ലൻചുമ

ഏതാനും മിനിറ്റുകൾ വരെ നീണ്ടു നിൽക്കുന്ന ശക്തമായ നിർത്താതെയുള്ള ചുമ രോഗിയെ പരവശനാക്കും . ശ്വാസം കിട്ടാതെ കുട്ടി വെപ്രാളപ്പെടും. ചുമയുടെ ഈ നീണ്ട  നിരയുടെ അവസാനം കുട്ടി ദീർഘമായി ശ്വാസമെടുക്കുമ്പോൾ “ വൂപ്പ് ” എന്ന ശബ്ദമുണ്ടാകും . ചുമയുടെ അവസാനം കുട്ടി വളരെയധികം കഫവും മുൻപേ കഴിച്ച ഭക്ഷണ സാധനങ്ങളും ഛർദ്ദിക്കാം. ദിവസം 10 -20 തവണ വരെ വന്നേക്കാവുന്ന ഈ ചുമ നിരകളാണ് വില്ലൻ ചുമയിലെ പ്രധാന വില്ലൻ.

കൂടുതൽ അറിയുക

ഹിമോഫിലസ് ഇന്‍ഫ്ലുവെന്‍സാ ടൈപ്പ് ബി രോഗങ്ങൾ

ഹിബ് (HiB) ബാക്ടീരിയ മൂലം ഉണ്ടാകുന്ന രോഗങ്ങൾ, പ്രത്യേകിച്ച് കുട്ടികളെ ഗുരുതരമായി ബാധിക്കും. ഇത്തരം രോഗബാധിതരുടെ എണ്ണം വളരെ ഫലപ്രദമായ ഹിബ് വാക്സിന്റെ കണ്ടുപിടുത്തത്തോടെ ലോകവ്യാപകമായി ഗണ്യമായി കുറഞ്ഞിട്ടുണ്ടെങ്കിലും, ഇതു മൂലമുള്ള രോഗബാധയും, മരണനിരക്കുകളും ഇന്നും ഒരു പ്രധാന ആരോഗ്യപ്രശ്നമായി നിലനില്‍ക്കുന്നു.

കൂടുതൽ അറിയുക

ഹെപ്പറ്റൈറ്റിസ് ബി

ലോകത്തില്‍ ഏകദേശം 35-40 കോടി ആളുകള്‍ ഈ രോഗാണു വാഹകരാനെന്നാണ് കണക്കാക്കപെട്ടിട്ടുള്ളത്. ഓരോ വര്‍ഷവും 7,80,000 പേര് ഈ അസുഖം മൂലം മരണപ്പെടുന്നു. ഇന്ത്യയിലെ കണക്കെടുത്താല്‍, ജനസംഖ്യയുടെ ഏതാണ്ട് 3.5%, (4 കോടി ആളുകള്‍) ഈ രോഗാണു രക്തത്തില്‍ ഉള്ളവര്‍ ആണ്. ഓരോ വര്‍ഷവും 10ലക്ഷം പേര്‍ക്ക് പുതിയതായി ഈ അസുഖം വരുന്നു. ഹെപ്പറ്റൈറ്റിസ്  ബി മൂലം ഭാരതത്തില്‍ പ്രതിവര്‍ഷം ഒരു ലക്ഷം മരണം സംഭവിക്കുന്നു.

കൂടുതൽ അറിയുക